Part-I kan ti ve leh ngawt a.. a part dang a lo chhuak leh angem va hriat suh! Kan tlangval lai chuan tih lem ah.. khawnvartui pawh a rawn pawl tran chho chauh, cable TV kan nei vanga kan intihtheih hun lai a la ni! (1991-1995)
Sunday zing khawvar hma hret ah ruah a sur nghek a, Ni a rawn chhuah meuh chuan a sur bang hmiah tawh! khua a thiang kuk mai a, a sunday zing ngawih ngawih bik hian a hriat thrin. Sa hmeh Ni kan tih thrin kha a la ni zui, vawksa rep leh antram chhum pawlh rim a nam chak chak a, he thil rimchhe lo zet hian ni lum hnungpuak ar ar chunga vengchhung chanchinbu chiar a ti nuam lehzual thrin a nih kha. Pu Jim Reeves-an ‘Take my Hand‘ tih hla in min lo awi hlurh hlurh mai bawk si, a nuam a ni… chhungkaw PA ber in, ‘tukin zing chu kan tlai tlat, chhung inkhawm nei lo mai ang u‘ an tih hlauh trum phei hi chuan fuh chaih chaih thrin a ni.
Inkhawm tur an han kal sang sang a, an reh fel ta maw tih ah, bucket chhung ah no, surf, puanchhia leh brush ka’n vawm lut a, scooter sil tur in kawngpui lam ka’n pan chho hnak hnak a. Ka thrianpa VL-a pawh a maruti car sil tur in a lo inpeih leh ut tawh a, inkawmngaih hle mah ila kan inbe tam lo thei khawp a. Uluk takin ka scooter kan sil a, scooter sil e tilo chuan, a hnuai ah kan mu ve lo chauh zel nia! thrianpa VL-a chuan ngawi reng in a duh lai lai hi min lo tihfai pui a; reilo te ah kan sil zo mai zel, a fai thei teh mai a sin! Chutah kuhva leh cigarette kan han threi leh te te a, biakin kan hnaih bawk a, an zai ri dup dup pawh a hriat theih vek, a tam zawk phei chu muthlu tur in an insiamrem nasa tawh teh ang chu.
Tunah, car sil hun ve thung, VL-a anga motor atchilh hi an tam lo ang, tunah pawh bawngkawn ah khian Workshop a la siam reng nghe nghe. Car Shampoo ti deuh kher zel a, kei in ka lo hnawih phuan a, a ni in a rawn hru fai phei zel a, paint brush in a kil kar zawng zawng kan hru fai a, a hnuai ah kan lut thul, uluk zual chang phei chuan a ke te hi kan thlawn vek kher zel. Inkhawm ho pawh an muthlu tui hlom tawh viau ang, pawl an la hrang anga, zirtirtu te ho pawh mahni au au in an au mur mur anga, a bengchheng hle ang, mahse thlamuang taka muthlu chu a tam zawk an ni tho dawn tih pawh kan hai bik lo. Kei ni pawhin Metallica leh Tesla tih vel hla ngaithlain kan hun kan lo hmang liam ve mai mai tho, indem thei kan awm lo e. Tleuh fai a hun ta, a tleuh fai lai hi a pawimawh, tleuh fai thrat loh chuan, a rang duh…a ti VL’an.. tawk ka peih tawh lo.
Mahni lam: Inkhawm an bang trep tawh, inbual fai a hun ve ta. Phone a rawn ri ral ral a, thrianpa Te-a(L) ngei a ni, a ni pawh kan buai ang tho in, ramhlun vengthar lam ah, Scooter sil in a hun a lo hmang zo ve chiah. “Vawin engtin nge kan inchei ang, suit leh necktie ni leh mai em? kamis var nen?” a rawn ti ngei a.. dress code hi kan ngaipawimawh khawp- sunday ah na na na chuan.. a mah pui rouh hian, “suit nen thlap chuan ruih pawh a thring lo nge nge’ a ti miau a lom. Chuan, kan suit hak tur chu kan han nawt mar at a.. kan inbual san ta thrin.
Inkhawm an rawn bang a, towel veng trat in pawn nilum ah zozial kan lo zu leh telh telh hman tawh. Hmanhmawh a ngai ta, inkhawm an bang tawh. Kan insiam ve sawk sawk a, rimtui eng eng emaw chu kan han inkap ve bawk a. Tukverh ah kan dak thla vang vang a, thrianpa Te-a rawn in khalh chho ka zuk hmu vek thei.. kawngpui lam ka pan chho ve nghal a. Reilo te ah a rawn thleng mai… kan va han in READY tawh mai mai tak.. mahse VL-a hi.. buaithlak thei OVER, a inbual rei thei lutuk! amah hre chin chuan mak an ti vek, tlangval inbual ah chuan a rei ber ziah awm e.. darkar khat leh a chanve aia reilo a inbual kan la hre ngai lo. Nghah ngai bik ziah… thinrim treuh a kan nghah leh kan rel hrep hnu ah a hmel chhe pui bawk a rawn chhuah pui leh tho, a sam a la huh deuh leh a rimtui hret tih mai loh chu, chuti tak a hmeichhe ho in an duh thar thut na tur a hmelah hmuh tur a awm ngai chuang bik hauh lo.
CAR nge Scooter first tur? Car a chhuah hmasak a.. scooter lak leh tur nge, scooter a chhuah hmasak a a hnu a car lak leh tur.. kan rel fel nghal mai zel. Chawhnu inkhawm kal tran leh hma a chhuah hman a ngai tawh. A eng method zawk zawk pawh chuan kan han ving chhuak a, inbual fai bawk, motor/scooter fai bawk.. kan zang hak zel! Kan zang deuh hak nachhan kha ka han ngaihtuah let leh hian, wallet a lo ruak thrin em vang a ni tih ka hrechhuak leh hnuhnawh! Cheng sawmhnih aia tam ka nei khat khawp, mahse lungngaihthlak loh, Te-a awm a lom, a ni hi a trun thei deuh; mahse a phakar chu ka ti ngam lo na in, ka neih ang zawng zawng(neih zawng zawng tak tak) hi min hman zawh pui ngei ngei, ka nei tawh lo tih a hriat erawh chuan, engkim min tum sak leh thung, cigarette pawh min lei sak leh vek tho, nei miah lo a min siam kha a tum ber a ni mai, engmah ui a nei leh miah silo(baktea nen khan inan-na tam tak an nei!) .. ahh.. sawi tur a tam.. ‘Kei leh Te-a‘ tih pawh a ziah a ziah tham fe a ni… mahse thrangtharte zir tlak erawh zawng a inzep tlem khawp ang le. A eng chen nge ka ziah tawh.. len chhuah thleng a ni maw.. duhtawk phawt a ngai!!! Abigail-i harh lutuk in chemte a lo khawih, a kut a thi, kan tuam sak lawk ange.
Note: Thlalak hlui ka nei em kan zawng ange..
26 Responses
Stay in touch with the conversation, subscribe to the
RSS feed for comments on this post.
A sei bawk anih hi, chhiar fe hnuah pawh in In inla chhuahsan lo ania, Part 4 velah chuan in thiltih tak tak a chhuahvel han beisei phawt teh ang.
Testing…
February 21, 2010 at 8:14 am